WABUNGE WAMLILIA MWAIPOSA

Waziri Mkuu, Mizengo Pinda, akitoa heshima za mwisho wakati wa kuaga mwili wa marehemu Eugene Mwaiposa, kwenye viwanja vya Bunge mjini Dodoma jana.

Mchungaji wa Kanisa la Kiinjili la Kilutheri (KKKT), Dodoma, Samuel Mshana, amewataka viongozi wakiwamo wabunge katika kipindi hiki cha kuelekea Uchaguzi Mkuu, kuondoa `presha' na msongo wa mawazo kwa kumtanguliza Mungu mbele.

Akizungumza katika Ibada Maalum ya kuaga mwili wa Mbunge wa Ukonga, marehemu Eugen Mwaiposa (55), katika viwanja vya Bunge jana, Mshana alisema kipindi hiki cha kuelekea Uchaguzi Mkuu kuna misongamano ya presha kutoka kwa watu wengi wanaotaka kuwania nafasi za uongozi na kuwataka wasichepuke kwenda kwa `sangoma' (waganga wa kienyeji).

Mwaiposa anayetarajiwa kuzikwa Jumamosi, jijini Dar es Salaam, alifariki dunia usiku wa kumkia juzi kutokana na tatizo la shinikizo la damu akiwa amelala nyumbani kwake, mjini hapa. “Naomba mshushe presha, sisi tunawaombea, msipoteze matumaini kwa kuchepuka na kwenda kutafuta mambo mengine kwa sangoma,” alisema.

Alisema kipindi hiki ni cha watu kujichunguza mienendo yao na kwamba mpaka mtu anafikia hatua ya kutangaza nia ajue kuwa amemsimamia Mungu badala ya kutegemea michepuko. “Chunguza njia zao na kuzijaribu, kama hamkutuhudumia vizuri huu ni muda wa sisi kuwachapa, kama humkutoa huduma sawasawa huu si muda wa wewe kukimbilia kwa sangoma,” alisema.

Mchungaji Mshana alisema kuna watu wamepoteza matumaini na kuhoji kwa nini wanapoteza matumaini haraka hivyo na kuwataka kurudi kwenye imani.

Katika Ibada hiyo, Naibu Spika, Job Ndugai, Waziri Mkuu, Mizengo Pinda, Waziri Mkuu aliyejiuzulu na Mbunge wa Monduli, Edward Lowassa, Kaimu Msemaji Mkuu wa Kambi ya Upinzani, Tundu Lissu na Katibu Mkuu Kiongozi, Balozi Ombeni Sefue, ni kati ya viongozi walioongoza kuaga mwili wa marehemu. Katika viwanja vya Bunge, familia ya marehemu ikiongozwa na mume wake, Ally Mwaiposa, iliingia saa 6:01 mchana na mwili wa marehemu uliingia viwanjani hapo saa 6:14 mchana ukitokea Hospitali ya Mkoa wa Dodoma ulikokuwa umehifadhiwa.

 

BUNGE LAMLILIA 

Katika salamu za rambirambi, Naibu Spika Ndugai, alisema Bunge limepoteza msemaji na mtu wa vitendo. 

Alisema Mwaiposa alikuwa mmoja wa wanawake aliyethubutu kuingiia ubunge kwa ngazi ya jimbo na alipambana na kushinda. Alisema Spika wa Bunge, Anne Makinda, aliyekuwa safarini Geneva, amepokea kwa mshtuko mkubwa taarifa hizo na kwamba atashiriki katika maziko yatakayofanyika Jumamosi.

Mwakilishi wa familia ya Mwaiposa, aliomba Bunge limuenzi Mwaiposa kwa kujadili mchango wake aliotaka kuchangia katika Wizara ya Elimu Jumatatu, lakini kutokana na kujisikia vibaya na kurudi nyumbani kupumzika, aliwaomba wabunge wenzake wamsaidie kutoa mchango wake uliohusu jimbo lake.

 

LUKUVI: CCM IMEPATA PIGO

Kwa upande wa serikali, Waziri wa Nchini, Waziri Mkuu (Sera na Uratibu), Jenister Mhagama, alisema CCM imepata pigo kwenye jimbo lake la Ukonga na hasa kwa wananchi aliokuwa akiwawakilisha. “Alikuwa hodari na mwaminifu kwa wapiga kura wake alikuwa tegemeo kubwa na jembe imara kwa CCM, amekufa akifikiria wananchi wake,” alisema.

Alisema ndani ya bunge alikuwa ni rafiki wa kila mtu bila kujali huyu anatoka chama cha upinzani au chama chake.

 

KAMBI YA UPINZANI: ALIKUWA MBUNGE WA PEKEE

Kaimu Msemaji Mkuu wa Kambi ya Upinzani Bungeni, Tundu Lissu, alisema Mwaiposa alikuwa mbunge wa kipekee. Alisema Jimbo la Ukonga lina watu wengi na lipo katika mkoa wa Dar es Salaam ambao ni wa kisiasa, lakini alifanikiwa kushinda ubunge na kwamba alikuwa mfano si kwa wanawake tu bali kwa wabunge wote.

 

WABUNGE WANAWAKE: NI PIGO KWETU

Mwenyekiti wa Chama cha Wanawake Wabunge Bungeni, Anna Abdallah, alisema kifo hicho ni pigo kwa akina mama kwa kuwa alikuwa mtendaji, shupavu, jasiri na mpigania haki za wanawake wenzake ndani na nje. Alisema kutokana na ucheshi na urafiki kwa wabunge wenzake walizoea kumuita “Dear”. “Kwa heri Dear wetu, umetangulia na sisi tuko nyuma yako.”

 

KAMATI YA TAMISEMI: ALIKUWA MAKINI

Mwenyekiti wa Kamati ya Tamiseni, Dk. Khamis Kigwangwala, alisema Mwaiposa alihamishiwa katika kamati yake akitokea Kamati ya Mambo ya Nje kutokana na umakini na weledi wake wa kutosha kwenye mahesabu.

 

JK AMLILIA

Rais Jakaya Kikwete, ametuma salamu za pole kwa Spika wa Bunge la Jamhuri ya Muungano wa Tanzania, familia na ndugu na kueleza kuwa amepokea kwa mshutuko na masikitiko taarifa za kifocha Mbunge Mwaiposya.

 “Kwa hakika, taifa letu limepoteza kiongozi muhimu kutokana na kifo hiki. Mbunge Mwaiposya alikuwa mwakilishi hodari na mtetezi wa kuaminika wa wananchi wa Jimbo la Ukonga. Napenda kukutumia wewe Mheshimiwa Spika salamu zangu za rambirambi kwa kupoteza Mbunge mahiri sana. Aidha, kupitia kwako, nawatumia Wabunge wote salamu zangu za rambirambi kwa kuondokewa na mwenzao," ilisema taarifa ya Ikulu jana.

Rais Kikwete aliongeza: “Kupitia kwako, Mheshimiwa Spika, napenda pia kutuma salamu zangu kwa wananchi wa Jimbo la Ukonga ambao wamepoteza mwakilishi wao. Vile vile, napenda kutoa pole nyingi kwa familia, ndugu na jamaa wa Mbunge Mwaiposya kwa kuondokewa na mama na mchangiaji mkubwa katika maisha yao.”

Rais Kikwete alisema yupo pamoja na waliokubwa na msiba huo kwa kuwa anaelewa uchungu wao katika kipindi hiki na nawaombea subira ili waweze kuvuka kipindi hiki, ikiwa ni pamoja na kuungana na waombolezaji  kumwomba Mwenyezi Mungu aiweke peponi roho ya Mheshimiwa Eugenia Mwaiposya. Amina.

 

MEYA SILAA AIFARIJI FAMILIA 

Meya wa Manispaa ya Ilala, Jerry Silaa, ameifariji familia ya Mbunge Mwaiposo, katika eneo la Kipunguni B, Dar es Salaam.

Akizungumza na NIPASHE, Meya huyo alisema amepokea kifo hicho kwa kwa masikito makubwa kwa kuwa alikuwa kiongozi makini aliyewatumikia wananchi wake vyema huku akisisitiza yale yote waliyojadili katika vikao kabla ya umauti wake yatekelezwe kama njia ya kumuenzi. “Nimesikitishwa sana na kifo chake kimekuja ghafla bila kutegemea tutakuwa bega yale yaliyopangwa kutekelezwa na marehemu yatatekelezwa kama njia ya kumuenzi,” alisema.

Kwa upande wa Diwani Kata ya Kipawa (CCM), Bona Kaliwa, alisema msiba kifo hicho kimemshtua kwa kuwa marehemu alikuwa msaada  kisiasa na  kifamilia.

Msemaji wa familia, Winston Simbo, alisema mwili wa marehemu umewasili jana saa 8 mchana, Uwanja wa Ndege wa Kimataifa wa Mwalimu Nyerere (JNIA), kutoka Dodoma na kupelekwa moja kwa moja kuhifadhiwa katika Hospitali ya Taifa ya Muhimbili (MNH).

Alisema mwili utazikwa jumamosi nyumbani kwake baada ya watoto wake kurejea kutoka nje ya nchi. Aidha, alisema watoto marehemu wanaosubiriwa ni Mecktilida Mwaiposa anayetokea Cananda na Samira Mwaiposa kutoka nchini Malaysia. Marehemu ameacha watoto wawili na mume.

Bwana ametoa, Bwana ametwaa jina lake lihimidiwe,Amen

CHANZO: NIPASHE