MAJIMBO SITA YA UBUNGE 'YAPO WAZI'

Ikiwa imesalia miezi kumi kabla ya kufanyika Uchaguzi Mkuu unaotarajiwa kuwa na ushindani mkubwa, hadi sasa majimbo sita yako wazi baada ya wabunge wanaoyaongoza kutangaza kutogombea tena ubunge.

Ni wazi kuwa uamuzi wa wabunge hao, wengi wao wakiwa wameamua kupumzika baada ya kushikilia viti hivyo kwa vipindi zaidi ya viwili, utaibua ‘vita kali’, vikianzia ndani ya vyama wakati wa kura za maoni na baadaye baina ya vyama wakati wa kuomba ridhaa kwa wananchi. Mbunge aliyetangaza kuachia jimbo hivi karibuni ni Waziri Mkuu, Mizengo Pinda ambaye amekuwa mbunge wa Katavi kwa vipindi vitatu kuanzia mwaka 2000 akisema anakwenda kufanya kitu kingine.

“Wapo ambao hawatagombea sababu wanataka kuwania urais. Wapo waliotangaza kutogombea sababu tu ya demokrasia na kutaka kuwapisha wengine. Hilo ni jambo zuri,” alisema Profesa wa Chuo Kikuu cha Ruaha, Gaudence Mpangala. Profesa Mpangala alikumbushia pendekezo lililokuwapo katika Rasimu ya Katiba iliyoandaliwa na Tume ya Mabadiliko ya Katiba ambayo ilipendekeza kuwa mwisho wa kugombea uwe vipindi vitatu. “Pendekezo lile lilikuwa zuri ili kuwaondoa wanaokaa madarakani zaidi ya miaka 50, ila wapo wanaotangaza kutogombea kwa sababu tu za kisiasa,” alisema.

Vyama vya upinzani pia safari hii vitakuwa na kazi ngumu ya kuteua wagombea baada ya kufikia makubaliano chini ya Umoja wa Katiba ya Wananchi (Ukawa) kusimamisha mgombea mmoja kutoka miongoni mwao katika ngazi zote kuanzia Serikali za Mitaa. Vyama vilivyo chini ya mwavuli huo ni NCCR-Mageuzi, Chadema, CUF na NLD, wakati chama kipya cha ACT - Tanzania kilionyesha nguvu katika uchaguzi wa viongozi wa Serikali za Mitaa na kama hakitamaliza mgogoro, kinaweza kuwa tishio wakati wa kutafuta kura za wananchi utakapowadia.

Bernard Membe (Mtama)

“Unajua nimekuwa mbunge wenu kwa vipindi vitatu. Hivi leo ninawaaga rasmi kuwa sitagombea tena nafasi hii ya ubunge,” alisema Membe katika hafla ya Mwaka Mpya aliyoandaa nyumbani kwake Januari, 2013. Membe ni miongoni mwa makada wa CCM wanaotajwa kutaka kuwania urais, ingawa amekuwa akieleza kuwa anasubiri “kuoteshwa”. Iwapo atajitosa kugombea kuwania nafasi hiyo ya juu nchini, jimbo hilo litabaki wazi na tayari linawaniwa na kiongozi mmoja wa juu wa CCM. 

Hezekiah Chibulunje (Chilonwa)

Kiongozi huyo alitumia staili nyingine kutangaza uamuzi huo. Alichagua Desemba 26, mwaka jana kufanya ibada ya kumshukuru Mungu kwa kumwezesha kuwa Mbunge wa Chilonwa tangu 1995 na akatangaza kutogombea kwa maelezo kuwa umefika wakati wa kupumzika na kuwapisha wengine. Chibulunje amewahi kuwa Naibu Waziri wa Kilimo na Chakula; Viwanda na Biashara; Kazi; Miundombinu na Ushirika na Masoko. “Katika nafasi hizi zote za ubunge na unaibu waziri, sijawahi kupata misukosuko,” alisema.

Mizengo Pinda (Katavi)

Agosti 17, 2010, Waziri Mkuu Pinda, ambaye tayari ameshatangaza nia ya kugombea urais kimyakimya, alieleza kwa mara ya kwanza kuwa hatagombea tena ubunge katika Uchaguzi Mkuu wa mwaka huu, kauli ambayo wakati huo haikuhusishwa na mbio za urais na aliirudia hivi karibuni katika mkutano wa hadhara jimboni kwake akisema muda wa kuwa mbunge umetosha na sasa anatafuta kitu kingine cha kufanya. Awali, alisema mwaka 2010 ndiyo ungekuwa mara yake ya mwisho kugombea ubunge katika jimbo hilo, kauli aliyoitoa kwenye Ukumbi wa Katavi Resort, Mpanda wakati wa sherehe ya kumuaga aliyekuwa Mkuu wa Wilaya ya Mpanda, John Mzurikwao, aliyekuwa akihamishiwa Wilaya ya Sumbawanga.

Deogratias Ntukamazina (Ngara)

Mbunge huyo aliwaeleza wapigakura nyumbani kwake Ngara kuwa anahitaji kupumzika baada ya kukamilisha kazi yake. Alisema wakati akiingia madarakani mwaka 2010, aliwaahidi wananchi wa Ngara kupata umeme hadi vijijini na kwamba kazi hiyo ameifanya kwa kiwango kikubwa.

Anne Makinda (Njombe Kusini)

Kwa nyakati tofauti, Spika Makinda ambaye amekuwa mbunge wa kuteuliwa tangu 1975 kabla ya kuchaguliwa kushika ubunge wa Njombe Kusini mwaka 1995, amekaririwa na vyombo vya habari akisema mwaka huu hatagombea tena. Makinda amewahi kushika nafasi za ukuu wa mkoa, uwaziri na unaibu spika.

Zitto Kabwe (Kigoma Kaskazini)

Mbunge ambaye ameachia ngazi kwa staili ya pekee ni Zitto, ambaye awali, alionekana kuwa na nia ya kugombea urais lakini nia yake hiyo ilikwama kutokana na Katiba ya sasa na Katiba Inayopendekezwa kutaja umri wa mgombea urais kuwa ni kuanzia miaka 40. Mwaka huu Zitto anatimiza 39. Lakini, mbunge huyo kijana ameamua kutogombea Kigoma Kaskazini ambako ameongoza kwa vipindi viwili, lakini atagombea jimbo la Kigoma Mjini ambalo kwa sasa linaongozwa na Peter Serukamba (CCM).

Hamad Rashid Mohammed (Wawi)

Kwa upande wake, Hamad ambaye kwa sasa ana mgogoro na chama chake cha CUF ambao umewafikisha mahakamani, amesema mara kadhaa kuwa hatarudi jimboni kwake Wawi, Pemba. Sasa anawania urais kupitia ADC.

CHANZO: MWANANCHI