MEMBE: WAPIMENI WATANGAZA NIA

Waziri wa Mambo ya Nje na Ushirikiano wa Kimataifa, Bernard Membe amewataka wananchi kuwapima wanaotangaza nia ya kugombea nafasi za urais kama wana maadili ya dhati katika kutokomeza rushwa.

Akizindua Tamasha la Ulamaa la Qaswida katika shule ya Benjamen Mkapa jana, Membe alisema uongozi wa heshima ni ule wenye kuzingatia maadili na unaochukizwa na vitendo vya rushwa.

Alisema rushwa ni kero kubwa kwa wananchi, hivyo viongozi waadilifu pekee ndiyo wanaoweza kumaliza tatizo hilo. “Wachujeni viongozi wanaotangaza nia ya kuwaongoza, muwapime kama wana maadili ya kutosha, wapimeni kama siyo wala rushwa,” alisema na kuongeza:

“Rushwa ni tatizo kubwa, viongozi wasio na maadili hawawezi kumaliza tatizo la rushwa. Angalieni ni viongozi gani wenye sifa na maadili.”

Membe alisema watangaza nia hao wanapaswa kupimwa na wananchi hadi kwenye dini zao kama ni watu safi ambao wanafaa kuwaongoza.

Alisema ni vyema wananchi wakatumia muda wa kuwapima viongozi hao katika mambo mbalimbali na kuepuka kuwa wepesi wa kusikiliza kauli na kuzikubali. “Uongozi wa heshima ni ule wenye maadili. Viongozi bora ni wale watakaochukia vitendo vya rushwa  kwa nguvu zote, jamii imechoka kushuhudia vitendo hivi vinavyonyima haki,” alisema waziri huyo wa Mambo ya Nje.

Katika tamasha hilo, Membe aliahidi kuchangia kiasi cha fedha ambacho alikataa kukitaja akisema yeye si mtu wa kutafuta umaarufu katika masuala kama hayo. “Nitachangia katika tamasha hili, lakini sitasema hadharani ni kiasi gani kwa sababu sitafuti umaarufu mwepesi kupitia hela,” alisema.

Kuhusu ndoto yake ya urais, Membe alisema Juni 7, mwaka huu wananchi wakae kwenye runinga zao kwani atatangaza nia ya kugombea urais na kuomba ridhaa kwa CCM. Tayari makada wengine wa CCM wameshaweka hadharani dhamira yao ya kuwania kiti cha urais katika Uchaguzi Mkuu baadaye mwaka huu.

Tayari Waziri Mkuu wa zamani,  Edward Lowassa amezindua mbio hizo mwishoni mwa wiki mjini Arusha na Naibu Waziri wa Fedha Mwigulu Nchemba alizindua jana mjini Dodoma.
Mwingine aliyezidua nia jana ni Waziri wa Kilimo na Chakula, Stephen Wasira mjini Mwanza. “Siku hiyo nitawaeleza wananchi namna nitakavyoitoa nchi hapa ilipo na kuipeleka katika nchi yenye neema,” alisema Membe. Awali, Mkurugenzi wa Taasisi ya Ulamaa, Jumanne Ligotola aliwataka wananchi kulinda amani na utulivu kwa gharama zozote.

CHANZO: MWANANCHI