LOWASSA ATAKA NEC IACHE UTANGAZAJI MATOKEO URAIS

Mgombea urais kupitia Chama cha Demokrasia na Maendeleo(Chadema), anayeungwa mkono na vyama vinavyounda Umoja wa Katiba ya Wananchi (Ukawa), Edward Lowassa, ameitaka Tume ya Taifa ya Uchaguzi (Nec), kusitisha kutangaza matokeo ya urais yanayoendelea kutangazwa.

Kadhalika, Lowassa ameitaka Nec kuhesabu upya matokeo hayo kwa kutumia mfumo usio wa kidijitali (manual). Lowassa alitoa kauli hiyo jana wakati akizungumza na waandishi wa habari jijini Dar es Salaam, kuhusiana na mwenendo mzima wa utangazaji wa matokeo hayo.

Lowassa aliitaka Nec isitishe kutangaza matokeo hayo kwa maelezo kuwa siyo matokeo halisi bali, yamechakachuliwa.

Kwa mujibu wa Lowassa, matokeo ambayo waliyakusanya wenyewe kabla ya vituo vyao kuvamiwa na Jeshi la Polisi, yalikuwa yanaonyesha kuwa Chadema imeshinda kwa zaidi ya asilimia 60, lakini wanashangaa matokeo yanayotangazwa na Nec, ambayo yanaonyesha kuwa Mgombea wa Chama Cha Mapinduzi (CCM), Dk. John Magufuli, ameshinda.

Alidai kuwa yapo majimbo mengi ambayo kura za mgombea wa Chadema zimepunguzwa na kuongezewa mgombea wa CCM. “Mimi pamoja na Mgombea Mwenza, Dk. Juma Duni Haji,  kwa pamoja tunawaambia Watanzania na Jumuiya ya Kimataifa kuwa hatukubaliani na matokeo hayo, na tunaiomba Nec isitishe kutangaza na kuanza kuhakiki upya matokeo hayo kwa mfumo usio wa kidijitali,” alisema Lowassa.

Lowassa aliongeza: “Wasipositisha tutakaa tujadili namna ya kuchukua hatua nyingine.”

 

JUMA DUNI HAJI

Kwa upande wake, Duni alisema pamoja na matukio yaliyojitokeza katika uchaguzi huo ikiwamo matukio ya kukamatwa kwa masanduku ya kura bandia, lakini Nec haijatoa tamko lolote.

Alitolea mfano kwa majimbo ambayo alidai kuwa Dk. Magufuli ameongezewa kura kuwa ni Makunduchi ambalo  ameongezewa kura 2,650, Donge kura 357, Kiwengwa kura 3,889, Kwahani kura 2,530, Chalinze kura 100 na Mkuranga kura 1,000.

 

FREDERICK SUMAYE

Kwa upande wake, Waziri Mkuu mtaafu, Frederick Sumaye, ambaye alisaidia kampeni za Ukawa, alisema mpango wa uchakachuaji ulipangwa mapema.

“Mimi nashangaa kwamba, inawezekanaje masanduku ya kura ambayo ni nyaraka za ndani za Nec ambazo zinapaswa kulindwa, zikapatikana kwa watu, hapa kuna mawili ama imeshiriki au imezidiwa nguvu,” alisema na kuongeza: “Lakini ni kwa nini mpaka sasa Tume haijasema lolote juu ya tukio hilo.”

 

JAMES MBATIA

Kwa upande wake Mwenyekiti Mwenza wa Ukawa na Mwenyekiti wa NCCR-Mageuzi, James Mbatia, alisema hatua ya Nec ya kuendelea kutangaza matokeo ni batili na kwamba kuna mgogoro mkubwa wa kitaifa kutokana na kinachoendelea.

Mbatia alisema wanafanya vikao kujadili kabla ya kuamua hatua mbalimbali watakazozichukua.

 

SAEED KUBENEA

Kwa upande wake, Mbunge Mteule wa jimbo la Ubungo, Saeed Kubenea, alisema kwa upande wa jimbo hilo wamekataa kusaini matokeo ya urais kwa kile alichodai kura za Lowassa zimechakachuliwa.

Aidha, Lowassa aliwataka Watanzania kuwa watulivu katika kipindi hiki wakati hatua mbalimbali zikichukuliwa. “Ninawaomba wananchi wasishtuke kwa hiki kinachoendelea hivi sasa, ninaomba muwe watulivu wakati hatua nyingine zinachukuliwa na nawaomba vijana wasifanye fujo zozote,” alisema.

 

NEC: HATUCHAKACHUI MATOKEO YA URAIS

Hata hivyo, Nec imezikanusha tuhuma hizo na kueleza kuwa  haiko tayari kuendelea kulumbana na vyama vya siasa au wagombea.

Akizungumza na waandishi wa habari kabla ya kutangaza matokeo ya majimbo 51 ya urais yaliyopokelewa usiku wa kuamkia jana na kufanya jumla ya majimbo 164 yaliyotangazwa hadi jana saa 6:00 mchana, Mwenyekiti wa Nec, Jaji mstaafu Damian Lubuva, alisema matokeo yanayotangazwa ndiyo yaliyopokelewa kutoka kwenye majimbo husika.

Jaji Lubuva alisema matokeo yanayotangazwa yameshahakikiwa na kukubaliwa na mawakala waliopo katika majimbo husika na kwamba Chadema ina wakala kila kituo anayeyakubali. “Tunachosoma ni hukumu ya wananchi wenyewe, upotoshwaji unaofanywa haukubaliki, ni mbaya sana kwa Nec inayofanya kazi zake kwa mujibu wa sheria na Katiba, hatujaongeza hata nukta, tunatangaza jinsi walivyotuletea,” alisema Jaji Lubuva.

CHANZO: NIPASHE