TANESCO ISIINGILIWE, ASEMA MSAJILI WA HAZINA

Msajili wa Hazina, Lawrence Mafuru amesema viongozi wa serikali wanapaswa kutambua mipaka yao ya kiutawala, na kuliacha Shirika la Umeme Tanzania (Tanesco) lijiendeshe lenyewe kama taasisi ya kibiashara.

Pia amezitaka taasisi nyeti za serikali zinazodaiwa madeni na Tanesco kulipa madeni hayo mara moja, vinginevyo watakatiwa umeme pasipo kujali umuhimu wa taasisi hizo. Aliyasema hayo wakati wa ukaguzi wa miradi ya umeme inayoendeshwa na Tanesco, ikiwamo kituo cha kuzalisha umeme cha Kinyerezi kitakachokuwa na uwezo wa kuzalisha megawati 150.

Alisema viongozi wengi wa serikali wanasahau majukumu yao ya kiutendaji, na kufanya majukumu ambayo siyo yao akitolea mfano Tanesco inavyoingiliwa katika utendaji. Alisema kuna viongozi wengi wa serikali wanaokuwa na mamlaka ya kiutendaji kwa shirika hilo, jambo linalokwamisha Tanesco  kufikia malengo iliyojiwekea.

Mafuru alisema Tanesco linazidai fedha nyingi taasisi nyingi za serikali ambazo zinadaiwa kuwa ni nyeti na haziwezi kukatiwa umeme. “ Naagiza tena, kama kuna taasisi ambazo zipo chini ya Msajili wa Hazina na zinadaiwa na Tanesco ninaomba niletewa majina yake ili nianze nazo,” alisema Mafuru.

Mkurugenzi Mtendaji wa Tanesco, Felchesmi Mramba, alieleza kuwa ujenzi wa kituo hicho cha kuzalisha umeme cha Kinyerezi unatarajiwa kumalizika Juni mwaka huu. Alisema kitakapokamilika na gesi kutoka Mtwara itakapofika, kitakuwa na uwezo wa kuzalisha umeme mwingi utakaowatosheleza wakazi wa Dar es Salaam. “Kama mnavyoona kituo kinaendelea vizuri, mwezi wa sita kitakuwa kimekamilika na shida ya umeme haitakuwapo tena katika Jiji la Dar es Salaam,” alisema Mramba.

 

CHANZO: NIPASHE