SUGU ATANGAZIA WANANCHI KUCHUKUA SHERIA MIKONONI

Mbunge wa Mbeya Mjini (Chadema), Joseph Mbilinyi Maarufu kwa jina la Mr. II Sugu, amewataka wananchi mkoani Mbeya kuwashusha kwenye magari ya Serikali viongozi wa umma ambao wanavaa sare za Chama Cha Mapinduzi (CCM) na kisha kupanda magari hayo na kuzurura nayo mitaani.

Sugu alitoa wito huo juzi wakati akihutubia wananchi wa Kyela katika mkutano ambao uliandaliwa maalum kwa ajili ya kuwashukuru wananchi kwa kuchagua wenyeviti wengi wa Serikali za Mitaa wa Chadema kiasi cha kukiwezesha chama hicho kuongoza Halmashauri ya Mamlaka ya Mji Mdogo wa Kyela.
Alisema kuwa kumekuwapo na baadhi ya viongozi wa Serikali hususani Wakuu wa Wilaya ambao wanatumia vibaya rasilimali za umma kwa manufaa ya CCM badala ya masilahi ya wananchi wote. Alisema kuwa kuanzia sasa wananchi wenyewe wanastahili kulinda mali zao kwa kuwazuia viongozi wa aina hiyo kutumia magari ya umma kwa maslahi ya CCM.
“Kuanzia sasa ni marufuku kwa Mkuu wa Wilaya kuvaa sare za CCM kisha anapanda gari la Serikali, mukimuona Mkuu wenu wa wilaya hapa amefanya hivyo, mshusheni kwenye gari la Serikali mara moja,” alisema Sugu.
Kabla ya kuanza kwa mkutano huo, Sugu alichafua hali ya hewa katika jimbo hilo la Kyela ambalo linaongozwa na Waziri wa Uchukuzi, Dk. Harrison Mwakyembe, baada ya  kupokewa kwa maandamano makubwa, huku wananchi hao wakiimba nyimbo mbalimbali za kumdhihaki Dk. Mwakyembe.
Mapokezi hayo yalisababisha shughuli za wakazi wa mji huo kusimama kwa muda, ikiwa ni pamoja na  kufungwa kwa  barabara kuu ya Kyela – Itungi kwa  takribani saa moja kupisha msafara wa maandamano ambayo hayakuwa rasmi kutokana na kutokuwa na kibali cha Polisi.

 

CHANZO: NIPASHE