CCM, UKAWA WAENDELEA KUCHUANA

Askari wa Kikosi cha Zimamoto na Uokoaji wakizima moto uliowashwa na wananchi katika Ofisi ya Mtendaji, Kata ya Kizwite, Sumbawanga, Rukwa juzi baada ya kutokea kutoelewana wakati wa kuhesabu kura.

Wasimamizi wa uchaguzi katika maeneo mbalimbali nchini, jana waliendelea kutangaza matokeo ya uchaguzi wa Serikali za Mitaa, ambayo yameonyesha vyama vya upinzani vikichomoza na ushindi katika sehemu ambazo awali, hazikuwa ngome yake.

Katika mamlaka ya mji mdogo wa Usa River, Arumeru mkoani Arusha, Chadema kimepata ushindi katika mitaa mitano ya Mjimwema, Magadirisho, Manyata, Magadini na Kisambare wakati CCM imeshinda mitaa minne ambayo ni Ngaresero, Chemchem, Mlima-Sioni na Nganana.

Mbunge wa Arumeru Mashariki, Joshua Nassari alisema ushindi huo ni mkubwa kwani kabla hawakuwa na uongozi wowote katika vijiji lakini sasa wamechukua vijiji 29 na zaidi ya vitongoji 100.

CCM kwa upande wake, kimeendelea kumiliki Serikali za Vijiji vya Wilaya ya Longido, baada ya kushinda vitongoji 165 kati ya 168 na vijiji 47 kati ya 49. Mkuu wa Wilaya ya Longido, James Millya akizungumza jana alisema katika Mji wa Namanga, CCM imeshinda mitaa mitano, Chadema na CUF mtaa mmojammoja.

Katika vijiji vilivyopo pembezoni mwa Manispaa ya Shinyanga, msimamizi wa uchaguzi, Festo Kang’ombe alisema kati ya vijiji 17, CCM kimeshinda vijiji 14 na Chadema kimoja. Kang’ombe alisema kati ya vitongoji 84 katika manispaa hiyo, CCM imeshinda 65 na Chadema vitongoji 18.

Alisema uchaguzi utarudiwa kesho katika Mtaa wa Katunda baada ya kushindwa kufanyika juzi kutokana na mkanganyiko wa picha na majina ya wagombea. Katika Manispaa ya Mtwara (Mikindani), Msimamizi wa Uchaguzi, Lembakisye Shimwela alisema CCM ilipita bila kupingwa katika mitaa 11 kati ya 111.

Katika Halmashauri ya Wilaya ya Mtwara, CCM ilishinda vijiji 136 kati ya 197 na upinzani umeshinda vijiji 61. Tandahimba CCM imeshinda vijiji 102, upinzani vijiji 38 na Newala CCM imeshinda vijiji 120 kati ya 155 na upinzani vijiji 23. Katika Wilaya ya Masasi, CCM imeshinda mitaa 171 kati ya 189 na upinzani mitaa 12. Wilayani Nanyumbu, CCM imeshinda katika vijiji 70 kati ya 93 na upinzani umeshinda vijiji 12.

Mkoani Kagera katika Wilaya ya Muleba, kati ya vijiji 164 CCM imeshinda 89 dhidi ya Chadema (70) na CUF (5), vijiji viwili vya Goziba na Rulanda uchaguzi haujafanyika. Katika vitongoji 460 CCM imeshinda 298, Chadema (153) na CUF (9).

Dar es Salaam

Katika Manispaa ya Kinondoni, CCM imepeta kwa kushinda viti 133 vya uenyekiti, Chadema viti 34 na CUF 16 kati ya mitaa 197. Mitaa 13 haijafanya uchaguzi. Ofisa uchaguzi wa Manispaa ya Kinondoni, Valence Urassa alisema mitaa miwili haikufanya uchaguzi na 13 uchaguzi wake umeahirishwa. Katika Manispaa ya Temeke, habari zinasema CUF imeubuka mshindi katika mitaa ya Butiama na Mbagala na CCM imepata ushindi katika mitaa ya Matumbi, Njaro, Maganga, Maji Matitu, Kijichi, Mgeni Nani, Rangitatu na Vetenari. CCM imeshinda katika mitaa minne kati ya mitano ya Kata ya Ilala na mtaa mmoja haukufanya uchaguzi. Buguruni yenye mitaa sita, uchaguzi huo ulifanyika katika mitaa minne na CCM imeshinda mmoja na CUF mitatu. Katika Kata ya Ukonga yenye mitaa mitano, uchaguzi huo ulifanyika kwenye mitaa miwili na CCM imepata kiti kimoja na CUF kimoja. Chadema iliibuka mshindi kwenye Mtaa wa Mongo la Ndege.

Morogoro

Matokeo mengine ni ya mkoani Morogoro. Katika Kata ya Kiwanja cha Ndege yenye mitaa 13, CCM imeshinda mitaa 10. Chadema imeshindi mitaa miwili na CUF mmoja. CCM pia imechakua mitaa 12 ya Kata ya Sabasaba na katika Kata ya Lukobe ambayo ina mitaa minane, CCM imeshinda katika mitaa mitano na Chadema mitatu. Katika Mtaa wa Lukobe Juu, Chadema imepata kura 188 na CCM kura 166 wakati katika Mtaa wa Tushikamane, CCM imeshinda kwa kura 328 dhidi ya 299 za Chadema. Katika Mtaa wa Majengo Mapya, CCM imepata mitaa 376 huku Chadema ikipata mitaa 308 wakati katika Mtaa wa Tuelewane, CCM imeshinda mitaa 295 na Chadema mitaa 114. CCM pia imeshinda mitaa minane katika Kata ya Mafisa.

Kilimanjaro

Katika Kata ya Kahe Mashariki, Kilimanjaro yenye vijiji sita, CCM ilipata vijiji vinne na NCCR Mageuzi viwili wakati katika mji mdogo wa Bomang’ombe wilayani Hai, Chadema ilipata viti tisa dhidi ya vinane vya CCM.

Mwanza

Katika Kata ya Ilemela CCM imeshinda mitaa 106 na Chadema 62 na katika Wilaya ya Nyamagana Chadema imeshinda viti 70, CCM viti 96, ACT kiti kimoja na CUF saba.

Iringa, Njombe na Pwani

Katika Manispaa ya Iringa, Kaimu Mkurugenzi wa Manispaa hiyo, Erasto Kiwale ametangaza CCM kushinda mitaa 126 sawa na asimilia 69.6, Chadema mitaa 54 sawa na asimilia 29.8 na CUF mmoja. Kiwale alisema uchaguzi katika mitaa tisa ambayo haikufanya juzi, utafanyika leo.

Mkoani Njombe, CCM imeshinda mitaa 54 na Chadema imepata mitaa 28 Mji wa Njombe. Katika vijiji 108, CCM imeshinda 94, Chadema vijiji sita na NCCR Mageuzi kimoja.

Katika Halmashauri ya Wilaya ya Ludewa CCM, imeshinda kwenye vijiji 64, Chadema tisa. Vingine havikufanya uchaguzi. Wilayani Wanging’ombe ambako kuna vijiji 108, CCM imeshinda vijiji 94, Chadema saba na vingine saba havikufanya uchaguzi. Wilayani Makete matokeo hayajakamilika lakini CCM imeshinda vijiji 34.

Mkoani Pwani
 CCM wameendelea kuufanya mkoa huo kuwa ngome yake kwa kupata ushindi mkubwa katika sehemu nyingine. Katika Kata ya Dimani, Rufiji imeshinda vitongoji 11 na CUF viwili.

Kata ya Mwambao Chadema kimeshinda katika Kijiji cha Mchungu. Jimbo la Mafia CCM ilishinda vijiji 19 kati ya 23 na CUF imeshinda katika vijiji vinne.

Kibaha Mjini, CCM imeshinda katika mitaa 62 kati ya 73 iliyopo na upinzani umeshinda katika mitaa 10. Kibaha Vijijini kwenye vijiji 32, CCM ilishinda vijiji 31 ikiwamo mitaa 10 ilikopita bila kupingwa.

Bagamoyo Mjini, CCM imeshinda mitaa 57 kati ya 60 na CUF imechukua mitaa mitatu. Kwa upande wa vijiji wilayani humo, CCM ilishinda vijiji 67 kati ya 75 na vinane havijafanya uchaguzi. Wilayani Kisarawe CCM imeshinda vijiji 57 kati ya 66 na upinzani imeshinda tisa.

Uchaguzi haukufanyika katika Wilaya ya Mkuranga kutokana na sababu mbalimbali hadi Jumapili ijayo.

Tanga na Singida

Jijini Tanga CCM kimeshinda kwa asilimia 63 ikiwa na wenyeviti wa mitaa 118, kikifuatiwa na CUF iliyopata asilimia 33 sawa na wenyeviti 60 na Chadema viti viwili.

Msimamizi wa uchaguzi katika Wilaya ya Pangani, Zabib Shaaban alisema CCM imeshinda katika vijiji 23 ikifuatiwa na CUF kilichopata vijiji saba na Chadema vijiji viwili.

Hata hivyo, uchaguzi utarudiwa Jumapili katika mitaa minane kutokana na kutofanyika juzi baada ya kutokea dosari mbalimbali zikiwamo za ukosefu wa karatasi.

Katika Wilaya ya Handeni, CCM kimeshinda vijiji 88 kati ya 91 na upinzani umeambulia patupu. Uchaguzi katika vijiji utarudiwa.

Katika Manispaa ya Singida CCM kimeibuka kidedea baada ya kuzoa nafasi zote 50 za uenyeviti wa mitaa.

Msimamizi wa uchaguzi wa manispaa hiyo, Joseph Mchina alisema katika vitongoji 90 CCM imeshinda vitongoji 81 na CUF kimeshinda vitongoji vinane. Chadema kimoja.

CHANZO: MWANANCHI